unser Kreis Pinneberg

Zitat

100 Sekunden Platt
Halloween

29. Oktober 2011 | 06:00 Uhr | von Marianne Ehlers | Pinneberger Tageblatt

Süßes oder Saures - Marianne Ehlers macht sich Gedanken über das Fest "Halloween".

"Wat is egentlich Halloween?" seggt de een.

"Wat, weetst du dat nich? Dat is dat niege Fest ut Amerika, nee, ganz fröher keem dat ut Irland," seggt de anner.

"Un, wat schall dat? Kürbissen mit utsneden Nees, Muul un Ogen? Dor warr ik nich bang vör!"

"Bruukst ja ok nich. Ik bün eher bang, dat mien Finsterschieven schietig warrt vun’t Eier- un Tomatensmieten."

"Woso dat? Hest du wat utfreten, dat du bestraaft warrst?"

"Nee, ik will blots de lütten Halloween-Geister nix geven, wenn se seggt: Sötes oder Suers."

"Verstah ik nich..."

"Na ja, se meent egentlich: giff mi Sötes, sünst gifft dat wat Suers."

"Verstah ik dat richtig: wenn du ehr nix giffst, denn smiet se di wat an de Schieven?"

"Jüst so is dat. Un ik geev nix, wiel dat se mi ok nix geevt. Verleden Johr heff ik de Kinner fraagt, of se nich tominnst en Rummelpott-Leed wüssen, wat se mi vörsingen kunnen. Denn wörr ik ehr wat geven. Kunnen se aver nich."

"Un denn hebbt se dien Finsterschieven vullkleit..."

"Nee, ik heff oppasst ... man den annern Morgen weer uns Raathuus schietig."

"Dat köönt aver nich de Kinner weest sien - dat glööv ik nich!"

"Villicht weer dat en Halloween-Gespenst ut Amerika oder ut Irland!"

"Mag ween, de hett sik seker över uns Politikers argert - un hett dorüm de Eier un de Tomaten an de Schieven vun uns Raathuus smeten..."

"Dor magst du Recht hebben! Man liekers: wat maakt wi nu mit Halloween? Is dat wat för uns in Sleswig-Holsteen? Wi fraagt mal uns Lesers un Hörers!"

Gräsig Gröten vun Marianne Ehlers vun den Sleswig-Holsteenschen Heimatbund.